Айтканыбыз мамлекеттик кызматта бир тажрыйбасы жок Алымкуловду мээрман ажобуз Отунбаева министр кылып, калкалап келгени баарыбызга белгилүү. Акыркы үч-төрт жыл арасында бийликтин эрке баласы эмне иш аткарды? Жаштар менен мигранттардын таламын кантип талашты? Жумушсуздардын санын канчага төмөндөттү? Ушул суроолорго жооп издөө таризи аталган макаланы жазууга түрткү берди. Кыргызстандын булуң бурчунан жаштарды бириктирип, «Кыргызстан жаштар Кеңешин» түзүп алгылыктуу иштерди аткара баштады эле, акыры кеңеш эки-экиден чабышып, учурда бийликтин кекиртегине тыгылган сөөктөй болуп, оппозиция катарында жүргөнү белгилүү. Мында Алымкулов мамлекетке эмес, ага каршы иштеген министрби? деген суроо жаралат. Мындан тышкары канчалаган мектептерди жана бала бакчаларды салдырдым деген сөзүн көп угабыз. Кызыгы ал мектепти кимдин акчасына, кимдин атынан салдырып жатат? Угушумча министрликтин атынан бир да мектеп салынган эмес, ал эми салынган болсо өкмөттүн балансына министрлик тарабынан өткөрүлүп берилген документтер жокко эсе. Ал эми айдоо аянттарына суу чыгарып берип жатабыз, жүздөгөн гектар жерге суу чыгардык, жаштар эми айылда кармалып калат, деп айтканын артында төмөнкүлөрдү баамдасак болот. Суу чыгарылган гектар аянттар министр мырзанын кичи мекени Таласта жайгашкан, демек башка аймактарда жаштар жашабайт экен да. Мекенибизде жаштардын көйгөйлөрү көптүгүнө карабастан Алымкулов жетектеген министрлик жаштардын өнүгүүсүнө салым кошо турган бир дагы жеткиликтүү саясат иштеп чыккан эмес. Баса бир стратегиясы бар, 20 пункттан турган, бирок ал да белгилүү болгондой эч жерде, эч кандай иш аткарган эмес. Жаштар категориясына Алымкуловду тегеректеп жүргөн жаштар гана эмес, жогорку окуу жайларында, кесиптик окуу жайларда, мамлекеттик жана мамлекеттик эмес мекемелерде, базарларда эмгектенген, элет жеринде жашаган жаштар кирээрин унутта калтыргандай. Кыскасы жаштардын, айрыкча чектеш элет жерлерде кармалып, мамлекетибиздин бүтүндүгүн коргоого кандай салымын кошуп жатканы белгисиз болууда.
Көнүмүш адатка айланган той-топурларды, тегерек стол жана ар кандай шоу иш-чараларды өткөрүүдөн башка министрлик эч кандай иш алып барган эмес. Далили катары, үч жыл аралыгында жакырларга той берип, аларды үйлөнтүп жатканы. Ал да кандай ыргакта тандалаары белгисиз. Элдин айтымында министрликтин жамаатынын жакындары кирип, күнүн улантып келет дешет. Акыркы той берүү алдында кыргыз мигранттары Орусияда эң ири проблемаларга кабылып, айласын таппай турганда Алымкулов Бишкектин белгилүү Соң-Көл ресторанында 50 жупка той берип, чардап жатканы кейитет. Той болот, тойдун эртеси да болот демекчи, эртеси өзүнүн жакындарын алып Катар мамлекетине учуп кеткени болуп жатат. Мигранттардын, жаштардын маселелерине караганда өзүнүн ишин аягына чыгаруу артыкчылыктуу болуп жатса керек. Мигранттар тырмалап, бөтөн эл, бөтөн жерде күнүмдүк нанын таап жатканы Алымкуловду, анын артында министрликти кызыктырбагандай көрүнөт.
Себеби, министрлик чет жактан келген жарандарга уруксат берүү менен да иш алып барат. Бул болсо, белгилүү болгондой эле чоң акча менен байланыштуу. Министрликтин жетекчилиги мигранттардын таламын эмес, өз капчыгын кеңейтүү үстүндө иштеп жаткандай. Албетте, мамлекет менен мигранттардын кызыкчылыгына караганда, атка минер эл баатыры өз капчыгын толуктаганы биринчи кезекте да. Албетте, буга толук далилибиз жок болсо да, Алымкуловдун салып жаткан особнягы, көп кабаттуу тамдан сатып алган үйү кайсыл каражаттарынан. Ооба, айтымы боюнча бизнесинен, бирок мыйзамга ылайык мамлекеттик жогорку кызматта отурган адам эч бизнес менен алектенбеш керек. Экинчи жагынан, билишибизче Алымкуловдун бизнеси салык жагынан да, социалдык фонд жагынан да аракеттенбеген катары отчет тапшырып келет. Демек, кайсыл акча, кайсыл жактан келгенин өзүңүздөр баамдаңыздар. Май кармаган бармагын жалайт, а эртен иштен алса бийлик акмак болот. Саясатчылардын көнүмүш адаты. Алымкулов да ошол жолдон тайбайт болуш керек. Ал эми жумушсуздардын саны мигрант болуп кетип жаткандардын эсебинен азайып жатат десек жаңылышпайбыз. Акаев доорунда кеминизм терминин киргизип, андан азыркыга чейин арыла албай келебиз. Дал ушул теминди эми таласизм деп атоого туура келет. Миграция министрлигинин ичинде дал ушул термин тамыр алып келе жатат. Алымкуловдун орун басары, кесиби медик, эң жакын адамы, жакында айымдарды аз төрөөгө чакыруу менен сенсацияга кабылган Чаргынов мырза, дагы бир орун басары, кесиби боюнча энергетик, кезинде Ош электронун сызга отургузуп кеткен, СДПКнын кишиси, Алымкуловдун кол баласы, досу Бекмурзаев. Кесиптик билим берүү агенттигинин жетекчиси дал ушул таласизм демилгесинин катышуучулары. Мында катардагы кол балдары, кадр, аудит, эсеп-кысап, эл аралык кызматташтык, басма сөз бөлүм башчыларын эсепке албай эле досторумду да, туугандарымды да аёосуз жазалайм деди өткөндө ажобуз Атамбаев. Бирок эл баатыры, мураскору, эрке баласы Алымкуловго карата күчү жетпейт го. Же, дал ушул адамды иштен алып, өлкөнүн социалдык бөлүгүнүн эң ири мекемесин жетектегенге иш билгилиги жогору болгон, мамлекеттик кызматты түшүнгөн адамды дайындайт бекен. Аны учур көрсөтөт.